امروز : ۲۵ مهر ۱۳۹۶
تبلیغات   |   درباره ما   |   تماس با ما
تبلیغات
سامانه پیام کوتاه
سامانه پیام کوتاه سنگسر نیوز
پیش بینی آب و هوا
مهدیشهر
مهر ۲۵, ۱۳۹۶, ۴:۲۸ ق.ظ
 

صاف
13°C
رطوبت: 41%
سرعت باد: 1 m/s غرب
اطلاعات بیشتر...
 
آمار سایت
  • 3
  • 1,074
  • 3,395,695
  • 1,104
  • 3,697
  • فروردین ۱۰, ۱۳۹۶

شۂ برێ یی وهاشتۂ مال

احمد صداقتی

نۆ قہ دیم  کۂ  مرکێهین  دہ ب هۆ شۂ  پور دارت. نێ  ئشتۉن  زندگی، مال  ۉ  ثروہ ت،  یێکۂ  سہ ردی، کۂ  دۉمبہ ک   ۉ کۂ  روا  دارت. وہ ختی  بمہ رت،  مہ ستہ رین  پور ئی  سہ ردی  دۂ ، میۉنی  ئی  دۉمبہ ک  دۂ  ۉ روا  دۂ  کہ ستہ رین  پور ئی  وگێرت.

مہ ستہ رین  ئی  سہ ردی  دۂ  وگێرت  بش هۆ  یێکۂ  حاجی ئادم  یی  کێ  یی  کہ لۂ  یی  دیم ئندێ  ۉ تاژۂ  خیال  دارت  کہ لۂ  لۆو شۉ  کۉ  حاجی  یی  صدا  دۂ  بشنۉند  کۉ  ئشتۉن  ژن  دۂ  می ها: «ئہ  شۉندهی  فلۉنی  مۉن  مۉملۂ کرهی،  ئہ گہ ر  مہ  ۉ  نێ  مۉملۂ  سہ رئگێرت  هشکین  دۂ رایی کندهی پول  دہ رهہ موجیلی  دۂ  نێ  دۂ  بیارهۂ.» یۉن  دۂ  بوات  ۉ کێ  بہ ر بش هۆ. پورۂ ئی کۉ خیال دارت حاجی یی کێ دۆزدی هاکرهۂ، حاجی یی  حہ رف دۂ بشنۉند ۉ یاواشو سہ ردی  دۂ  وگێرت  بوہ  ئشتۉن  کێ  هۉندێ  ۉ  وگہ ردهێ  بم هێ  حاجی یی  کێ  بہ ر  بژێ.

حاجی  یی  ژن  واپۆرس هۂ: « کی هێ؟» پور ئی  بوات: « حاجی  ئی  مہ  دۂ  رایی  کہ رتہ موجیلی  دۂ  بہ برهی.»  حاجی یی ژن  ئی  فکرهاکہ رت  کۉ  حاجی ئی  نێ  دۂ  رایی  کہ رتہ ، موجیلی دۂ  نێ  دێ. پورۂ ئی  خاشال موجیلی  دۂ  وگێرت  ۉ  بش هۆ.  وہ ختی  حاجی  کێ  رێ  وگہ ردهێ  ژنا  نێ  مۉن  واپۆرس هۂ: «تہ  ۉ  فلۉنی  یی  مۉملۂ  چیچ  بوهۆ؟» حاجی ئی  بوات: « هۆوچو، هہ م  مۉملۂ  سہ رنگێرت.» ژنا ئی بوات: «پہ س  پول  دۂ  بوہ رت  چکرهۂ؟» حاجی ئی می ها: « پول  کێی  دہ ب هۆ؟ » ژنا ئی  بوات: « مہ گہ ر  تہ  کۆتۂ  دۂ  رایی  نہ کہ رت بۆ  پول  دۂ  بہ برهۂ؟ » حاجی ئی می ها:« مہ هشکین  دۂ  رایی  نہ کہ رت بۉ.» خلاصۂ  حاجی ئی  پول  دۂ  بہ نگ نگێرت  ۉ  هہ م  هاسنہ ک یی  مہ ستہ رین  پور  حاجی  یی  پول  مۉن  ئرباب  گہ رد هێ.

میۉنی ئی  کۉ  بدی  دادا  بش هۆ  ئشتۉن  سہ ردی  مۉن  پول  بہ نگێرت ، دۉمبہ ک   دۂ  وگێرت  ۉ رێ سہ رت، بش هۆ  تا  شۆو سہ رت  ۉ  یێکۂ  خرابۂ کلۉم سرێ  یی  دہ نو  بخۆت. ئہ نی  خۆو وناشۆب هۆ  کۉ  خہ تۂ  وہ رک  دہ نوم هۂ . نێ  وہ رکۉن  تہ رس  یی  پی  ئشتۉن  دۂ  جہ م هاکہ رت  کۉ  نێ  دۉمبہ ک ئی  درنگ هاکہ رت.  وہ رک  بتہ رس هۂ  ۉ  برۉم هۂ  ۉ  بہ رشۆتن  رێ  بہ ر  یی  دیم  گن هۂ  ۉ  بہ ر  دوین هێ. کۆتۂ ئی  بدی  وہ رک  دۉمبہ ک  یی  صدا  مۉن  بتہ رسی هن  خاشال  هاب هۆ  ۉ  دۉمبہ ک  دۂ  وگێرت  ۉ  بناکہ رت  بژێتن. وہ رک هێین  تہ رس  رێ  هێی  ئشتۉن  دۂ  داردیفار  می ژێ. یێکۂ  تاجہ ر  نۆ  گودہ ر  نهۉنجێ  رہ د  می وهۆ  کۉ  بدی  کلۉم سرێ  یی  دہ نو  زۆوز  بلند هہ. تاجہ ر ئی  بہ ر  دۂ  واکہ رت  ۉ  وہ رک  جا  بہ ر بریژ هۂ  ۉ  بۉریت. دۉمبہ ک ژن کۆتۂ  ئی  وہ ختی  بدی  تاجہ ر ئی  بہ ر  دۂ  واکہ رت هہ  ۉ  وہ رک  بہ ربشوهن  جلۆوئم هێ  ۉ  مرکێهین ئی  یہ خۂ  مۆس هێ  ۉ  بوات: « تہ  کلۉم سرێ  یی  بہ ر  دۂ  چێ  واکہ رت  کۉ  وہ رک  بۉریژ هن؟ یۉن  وہ رکۉن  دۂ  شا ئی  مہ ن  دێ بۆ  ئنۉن  دۂ  رہ قص  بہ دێ هی . ئسۂ  پیندۂ  چکہ رتن؟  ئہ گہ ر  وہ رکۉن  رہ ج  بہ ش هو  ۉ  ئنۉن  دۂ  دو رێ  جہ م هاکر هی  مہ  رێ  خہ لی  خہ رج  وگیند هۂ. تۆ  پیندۂ  یا  مہ  خسارہ ت  دۂ  مہ ن  دێ هۂ  یا  کۉ  شۉند هی  شا  یی  پرۉن  تہ  دہ ست  دسپارند هی.»  تاجہ ر  هێین  دسپارتێتن  تہ رس  رێ  ئیلہ کنێ  پول  نێ  دێ  ۉ  بش هۆ. یۉن  برێ  هێین  یۉن  پول  مۉن  دارا  گہ رد هێ. بمۉن هێ  کہ ستہ رین  برێ.

کہ ستہ رین  برێ  ئی  وہ ختی  بدی  نێ  دو  برێ  بش هۉ  سہ ردی  ۉ  دۉمبہ ک  مۉن  ئشتۉن  رێ  پول  بہ ر  بیارت ، نێ  هێین  روا  دۂ  وگێرت  ۉ  دێ  بہ ر  بش  هۆ  تا  کۂ  جگا  برس هێ  بدی  هہ ر  چۉند  قہ دم  کۂ  نہ فہ ر  ئێشتی هن  ۉ  چۉ  دہ ست  دان هن. ئنۉن  مۉن  هاپۆرس هێ  کۉ  چێ  هہ ر  چۉند  قہ دم  کۂ  نہ فہ ر  چۉ  دہ ست  گێرتہ  ئێشتی هن. وگاردنێ  بوات  کۉ  یۉن  ملک  موش  خہ لی  داندهۂ  ۉ  ئنۉن  دہ ست  ئاسایێش  ندان هۉن  ۉ  نێ  خاطہ ر  هہ ر  چۉند  قہ دم  کۂ  چۉ  دہ ست  گێرتہ  کۉ  نوارز هۉن  موش یی ئازار  مہ رتۉم  بہ رس هۂ. نێ بوات: « خا  ئہ مشۆ  موشۉن  مۉن  کار ندار هین ، ئہ  زۉند هی  ۉ  موش.» ئنۉن  هێین  چۉ  دۂ  هۉرۉند  ۉ  بش هۉ. تا چۉدہ ست دار ئادم  بش هۉ  نێ  بدی  کۂ  دونیا  موش  جہ م  هاوهۂ. نێ  هێین تۉند  روا  دۂ  عہ با  یی  ژیر  بہ ر بیارت  ۉ  روا ئی  موشۉن  دلۂ  بدێ  ۉ  نہ  چۉند  بخارت  ۉ  نہ چۉند  خہ فۂ  کہ رت، بہ قیێ  هێین  بۉریت. وگہ ردێ رۉژ  یۉن  خہ بہ ر  شا ئی  برس هێ. وہ ختی  شا  سہ رساب  بوهۆ  نێ  دۂ  ئشتۉن  پیش  ئاوہ رت  ۉ  روا  دۂ  گرۉن  نێ  مۉن  برشیند. نێ  هێین  پول  دۂ  وگێرت  ۉ  دێ  رێ  وگہ رد هێ  ۉ  هہ ر  شۂ  برێ ۉن  ئشتۉن  پول  مۉن  ئشتۉن  زندگی  دۂ  قیار گاردنێ.

ئسۂ  وێتێ هۉن  روا  چکند ها. کۂ  رۉ  روا  ئی  خۆرکہ شو  کہ رت بۆ  کۉ  شا یی  کہ نیز  نی  وہ ر  رہ د  بوهۂ  ۉ  پێ  نی  دۉم  یی  سہ ر  ئندهێ. روا  نی  روف  پہ رهۂ  ۉ  کہ نیز  یی  دہ ست  زہ خم  بوهۆ. شا  رێ  خہ بہ ر  بوہ  کۉ  تہ  روا  ئی  ئہ دہ ر  بخارتہ ، مہ ست  کہ رتہ  ۉ  فلۉن  کہ نیز  رێ  نہ ظہ ر  داندها. شا  بفہ رم  هێ  کۉ  روا  دۂ  بہ بر  هن  دریا  وۉن  هن. کۂ  نہ فہ ر  ئی  روا  دۂ  ئہ سم  یی  سہ ر  هۉندێ  تا  نی  دۂ  دریا  وۉن  هۂ.  تا  بش  هۆ  روا  دۂ  پرتۆو  کرهۂ  نی  ئہ سم  یی  زین  دۂ  چہ نگ  هاژێ. مرکێهین ئی  خیال  دارت  نی  دۂ   بگیر هۂ  دو  رێ  دریا  وۉن  هۂ  کۉ  ئشترێ  کہ لۂ  تۆکی  دریا  سہ رت  ۉ  غہ رق  هاوهۆ. روا  ئی  هہ م  وێری  زین  یی  دیم  چہ نگ هاژێ وۆ  کۉ  ئہ سم  کێ  رێ  وگہ ردهۂ. مہ رتۉن  تا  روا  دۂ  ئہ سم  یی  سہ ر  بدی  بتہ رس هۂ  ۉ  بۉریت  شہ هر  بہ ر  بش هۉ  ۆ روا  نۆ  ملک یی  دلۂ  تہ نها  بوۉن  هۂ. چۉند  سال  وگہ رد هێ  کۂ  رۉ  مہ رتۉن  دو  نہ فہ ر  دۂ  رایی  کہ رت  وێتێ  هن  ئہ گہ ر  روا  بشو هۆ  ئنۉن  وہ گہ رد هن. ئنۉن  بش هۉ  بدی  روا  یێکۂ  بۆز  یی  مہ چی  بووهۆ  ۉ  خۆرکہ شو  خۆت هۆ  ۉ  دہ ر هۆ  سبیل  دۂ  پہ نجۂ  ئنجند ها. نۆ  دو  نہ فہ ر  بۉریت  ۉ  خہ بہ ر  بوہ رت  کۉ  روا ئی  خۆرکہ شو کہ رت  بۆ هہ  ۉ  نی  ئۆوقات  خہ لی  تہ ل  بۆ هہ  ۉ  واتہ  ئہ گہ ر  خا  دۂ  بوین  هی  هہ مزین  کند  هی  ۉ …

خلاصۂ  نۆ  مہ رتۉن  ئی  ئہ چین  ئشتۉن  دیار  دۂ  تہ رک  هاکہ رت  ۉ  بش هۉ.

 

Šě  bre  yi  vhâště mâl

   No qadim kě mrkehin dab ho šě pur dârt.Ne ěštwn zndgi, mâl w srvat, yekkě sardi, kě dwmbak w kě rvâ dârt. Vaxti bmmart, mastarin pur ei sardi dě, mywni ei dwmbak dě w rvâ dě kastarin pur ei vgert.

   Mastarin ei sardi dě vgert bš ho yekkě hâji âdm yi ke yi kalě yi dim ěnd he w tâžě xyâl dârt kalě lov šw kw hâji yi sdâ dě bšnwnd kw ěštwn žn dě mihâ: ” a šwnd hi flwni mwn mwmlě kr hi, agar ma w ne mwmlě sar ěgert hškin dě râyi knd hi pul dar ha mujili dě ne dě byâr hě.” Ywn dě bvât w bar bš ho. Purě ei kw xyâl dârt hâji yi ke dozdi hâkr hě, hâji yi harf dě bšnund w yâvâšu sardi dě vgert bva ěštwn ke hwnd he w vgard he  bm he hâji yi ke bar bže.

   Hâji yi žn vâpors hě: “ki he?” pur ei bvât:” hâji ei ma dě râyi karta mujili dě babr hi.” Hâji yi žn ei fkr hâkart kw hâji ei ne dě râyi karta, mujili dě ne de. Purě ei xâšâl mujili dě vgert w bš ho. Vaxti hâji ke re vgard he žnâ ne mwn vâpors hě: ” ta w flwni yi mwmlě cit bv ho?” hâji ei bvât:” hovcu, ham mwmlě sar ngert.” Žnâ ei bvât:”pas pul dě bvart ckr hě?” hâji ei mihâ:”pul key dab ho” žnâ ei bvât:”magar ta kotě dě râyi nakart bo pul dě babr hě?” hâji ei mihâ:”ma hškin dě râyi nakart bo.” Xlâsě hâji yi pul dě bang ngert w ham hâsnak yi mastarin pur, hâji yi pul mwn ěrbâb gard he.

   Mywni ei kw bdi dâdâ bš ho ěštwn sardi mwn pul bangert, dwmbak dě vgert w re sart, bšo tâ šov sart w yekkě xrâbě klwmsre yi danu bxot. Ani xov vnâšob ho kw xattě vark danum hě. Ne varkwn tars yi pi ěšwn dě jam hâkart kw ne dwmbak ei drang hâkart. Vark btars hě w brwm hě w baršotn re bar yi dim gn hě w bar dvin he. Kotě ei bdi vark dwmbak yi sdâ mwn btarsi hn xâšâl hâb ho w dwmbak dě vgert w bnâ kart bžetn. Vark heyn tars re hey ěštwn dě dârdifâr miže. Yekkě tâjar no gudar nhwnje rad miv ho kw bdi klwmsre yi danu zovz blnd ha. tâjar ei bar dě vâkart w vark jâ bar briž hě w bwrit. Dwmbakžn kotě ei vaxti bdi tâjar ei bar dě vâkarta w vark bar bšu hn jlov ěm he w mrkehin yi yaxě mos he w bvât:”ta klwmsre yi bar dě ce vâkart kw vark bwriž hn? Ywn varkwn dě šâ ei  man de bo ěnwn dě raqs bade hi. Ěsě pindě ckartn? Agar varkwn raj baš hu w ěnwn dě du re jam hâkr hi ma re xali xarj vgind hě. To pindě yâ ma xsârat dě man de hě yâ kw šwnd hi šâ yi prwn ta dast dspârnd hi.” Tâjar heyn dspârtetn tars re ilakne pul ne de w bš ho.ywn bre heyn ywn pul mwn dârâ gard he. Bmwn he kastarin bre.

   Kastarin bre ei vaxti bdi ne du bre bš hw sardi w dwmbak mwn ěštwn repul bar biârt,ne heyn rvâ dě vgert w de bar bš ho tâ kě jgâ brs he bdi har cwnd qadm kě nafar ešti hn w cw dast dân hn. Ěnwn mwn hâpors he kw ce har cwnd qadm kě nafar cw dast gerta ešti hn. Vgârdne bvât kw ywn mlk muš xali dând hě w ěnwn dast âsâyeš ndân hwn w ne xâtar har cwnd qadm kě cw dast gert ha kw nvârz hwn muš yi âzâr martwm bars hě. Ne bvât:”xâ amšo mušwn mwn kâr ndâr hin, a zwnd hi w muš.” Ěnwn heyn cw dě hwrwnd w bš hw. Tâ cw dast dârt âdm bš hw ne bdi kě dunyâ muš jam hâv hě. Ne heyn twnd rvâ dě abâ yi žir bar biârt w rvâ ei mušwn dlě bde w nacwnd bxârt w nacwnd xafě kart, baqyeheyn bwrit. Vgarde rwž ywn xabar šâ ei brs he. Vaxti šâ sarsâb bv ho ne dě ěštwn piš âvart w rvâ dě grwn ne mwn bršind. Ne heyn pul dě vgert w de re vgard he har šě brewn ěštwn pul mwn ěštwn zndgi dě qyâr gârdne.

   Ěsě vete hwn rvâ cknd hâ. Kě rw rvâ ei xorkašu kart bo kw šâ yi kaniz ni var rad bv hě w pe ni dwm yi sar ěnd he. Rvâ ni ruf par hě w kaniz yi dast zaxm bv ho. Šâ re xabar bvart kw ta rvâ ei adar bxârta, mast karta w flwn kaniz re nazar dând hâ. Šâ bfarm he kw rvâ dě babr hn dryâ vwn hn. Kě nafar ei rvâ dě asm yi sar hwnde tâ ni dě dryâ vwn hě. Tâ bš ho rvâ dě dryâ vwn hě ni asm yi zin dě cang hâže. Mrkehin ei xyâl dârt ni dě bgir hě du re dryâ vwn hě kw ěštre kallě toki dryâ sart w qarq hâv ho. Rvâ ei ham veri zin yi cang hâže vo kw asm ke re vgard hě. Martwn tâ rvâ dě asm yi sar bdi btars hě w bwrit šahr bar bš hw w rvâ no mlk yi dlě tanhâ bvwn hě. Cwnd sâl vgard he, kě rw martwn du nafar dě râyi kart vete hn agar rvâ bšu ho ěnwn vagard hn. Ěnwn bš hw bdi rvâ yekkě boz yi maci bvu ho w xorkašu xot ho w dar ho sbil dě panjě ěnjnd hâ. No du nafar bwrit w xabar bvart kw rvâ ei xorkašu kart bo ha w ni ovqât xali tal bo ha w vâta agar xâ dě bvin hi hamzin knd hi w …

   Xlâsě no martwn ei acin ěštwn dyâr dě tark hâkart w bš hw.

دیدگاهتان را بنویسید

*

این مطالب را هم بخوانید ...